Երևանյան կրկեսի ելույթները բանակի օրվա առիթով (2015թ.)
Երևանյան կրկեսի ելույթները բանակի օրվա առիթով (2015թ.)
Բանակի օրվա առթիվ Երևանի կրկեսը նախաձեռնել է արտագնա ելույթների շարք՝ Հայաստանի Հանրապետության և ԼՂՀ սահմանները պաշտպանող մեր զինվորականների համար: Նոյեմբերյանի, Բերդի, Իջևանի, Ճամբարակի, Քարվաճառի տարածաշրջաններում իրենց ծառայությունն իրականացնող հայրենիքի պաշտպանների համար կրկեսի արտիստները բազմաժանր ու զվարճալի ծրագիր են պատրաստել:
Հատկանշական է, որ մեր կրկեսի արտիստները ելույթներ են ունենալու ոչ միայն զորամասերում, այլև մտադիր են ուրախացնել անմիջականորեն մարտական դիրքերում հերթապահության մեջ գտնվող զինվորներին:
Համերգային ծրագրում հիմնականում ընդգրկված են կլոունադայի համարներ: Զինվորներին նաև առաջարկվելու է մասնակցել ներկայացմանը: Զինվորների ինտերակտիվ մասնակցությունը խթանվելու է զանազան մրցանակներով:
Նշենք, որ կրկեսի այս հյուրախաղերը բարեգործական են և իրականացվում են Երևանի քաղաքապետ Տարոն Մարգարյանի աջակցությամբ: «Արվեստը՝ բանակին» խորագրով այս համերգային ծրագիրը մշակել է Ենգիբարյանի անվան կրկեսային ստուդիայի ղեկավար Նաիրա Պետրոսյանը:
Ի դեպ, փետրվարի 15-ից կսկվի ստուդիայի ընդունելությունը: Կրթությունը ստուդիայում անվճար է: Հավելենք, որ Երևանի կրկեսի այս տարվա բոլոր ելույթները նվիրված են Հայաստանի ժողովրդական արտիստ, լեգենդար Լեոնիդ Ենգիբարյանի 80-ամյա հոբելյանին:
